الصحيح امبارح بعد الدوام اصر علي زميل الا اتغدى عنده ومع شدة الاصرار رحت
اتاريه طابخ منسف وبيني وبينكم امام المنسف ما اقدر اقاوم
لهطنا كل الاثلاث المخصصة للاكل والماء والهواء وترسناها جميد وروحت ماني شايف الضو
غطيت بالنوم وخير اللهم اجعله خير شفت منام من الاخر
دخلت بمكان ما اعرفه الا من بعيد في عرس وصوت دحية واطلاق نار طبعا مثل هذه الاحداث
مغناطيس عندي
قبل ما اصل العرس شفت واحد ضعيف وماسك الموبايل ونازل على زاوية وذايب على الاخر
الصاعقة بقول وين شايفه الخال ............ اه اتذكرت هذا فتى الجنوب والله شايف صورته بالمنتدى
مرحبا يا خال ... اهلين ... بالله عليك منتا فتى الجنوب بمنتدى شباب الاردن
وانت شو عرفك ونفخ صدره ........ قلتله هدي انا الكعابنة
ربنا الله ضحك وعانقني ... قلتله شو بتسوي هون
قال عرس لصاحبنا ........ وعلى فكرة الشباب والصبايا اغلبهم موجودين
صابني الفضول اكثر معقول اخيرا نشوف الشباب وهالغزلان الصبايا
قالي تفضل يالله ندخل
المهم على اول العرس شفنا واحد واقف معه قنوة بيني وبينكم اذكرت قاسم ابو قنوة
في العلم نور
وصلنا بقول لفتى الجنوب مين هاذ
قال يا خوي هاذ البص الكبير مهند شديفات
وصلنا مرحبا
اهلين بكشرة
مين معك يا فتى الجنوب ووين الاخ داخل تقول وكالة بدون بواب
بعدين كمل
الاخ مراقب .... مشرف ..... اداري
قلت لا عضو عادي
والله اهلين عضو شو مطلعك بهالليل لحالك
اتدخل فتى وقال هذا اخونا الكعابنة
قال كعابنة ما كعابنة ما بعرف قديش مشاركاتك
قلت حدود الالف .......... هز راسه قال مليح
قديش معك بالمصرف
قلت اكثر من عشر الاف
اذا هيك ادخل لانو النقوط مش اقل من خمس الاف
دخلنا طبعا الشباب بدحي عاملين صف والقايد انور داغر
وواحد قاعد على الكرسي هناك قبالهم كل شوي يوقف الدحية وينادي انور
شعره الاخ منكوش وحامل قلم وورقة
انور عندك خلل بالوزن والقافية في البيت الثالث يرجع انور ما يطرق بيتين قصيد
الا يناديه ونفس الكلام
قلت لفتى الجنوب مين الاخ
قال هذا الاستاذ جميل العرباتي
واحد رابط لفة خضرة مكتوب عليها المارد الاخضر
وكل شويه الخال يدخل بنص الدحية .... وحدات .... وحدات .... وحدات
قلت لفتى لا تقول هذا اكيد ابو رياش
طبعا كان يشرد بعد كل هتاف لانو ابو قنوة بلحقه ادارة يا عمي
المهم قلتله وين الغزلان
قال هناك قبالنا ببيت الشعر
اطلعنا وحدة لابسة مدرقة مزركشة وعصابة شماغ وغازة بنص العصابة علم الاردن
وبتصب قهوة للصبايا
قلتله وقف هاي اكيد هاشمية
قال هي بعينها
ناديت بدي اشوف وجها هاشمية هاشمية انا اخوك الكعابنة
لدت علي وتبسمت ويا ريت ما تبسمت ما في الا سنين واحد على اليمين وواحد على الشمال
قال غزال قال وما في احلى مني
في وحدة قاعدة لما سمعت اسمي دارت وجهها
البنت بجوز وزنها 150 وطولها متر او متر و10 سم
سالت الفتى قال هذه مس فيزياء
له له له يا ام نيوتن
بجوز شفتها هيك بالحلم لانها على كرسي الاعتراف
كم طولك .سر .......... كم وزنك ......... سر الله يسامحها
ما علينا
وحدة قاعدة على كرسي هناك جنبها عشر بكيتات علكة
واللي يمر من جنبها هاي ..... باي .......... وبس يروح اف ....اف حر كتير
قلت اكيد هذه نسمة صيف
قال هي بعينها
اللي كسر بخاطري
وحدة من بعيد بدها تجي وامها ماسكة فيها ما بتروحي عيب
قالت لامها والله بس بدي اسلم على الكعابنة
صاحت امها يا فضيحتنا وبهذاك الخماسي طراخ
بدك تفضحينا بالعرب الله لا يوفقك
المهم بعد التحري عرفت انها جاردينيا
في ناس كثير بس والله صحيت على صوت التلفون
ان شالله للحلم الجاي
ملاحظات مهمة
الاعضاء الوارد ذكرهم هم الاعضاء الذين اعتقد انهم راح يتحملوا ثقلة دمي مع احترامي لباقي الزملاء
والقصة لا تتعدى كونها حلم فاذا ورد أي تشابه بالاسماء او الشخصيات فهو من عمل الشيطان
ارجوا ابقاء الموضوع في قسم المواضيع العامة واتمنى من ابو قنوة وحاشيته عدم ممارسة صلاحياتهم في النقل
ليطلع عليه الجميع